Günther Sohm · 24. Jul 2013 · Literatur
Zwoa Päpscht
Der Dornbirner Liedermacher und Dialekt-Spezialist Günther Sohm macht sich Gedanken über den alten und den neuen Pontifex.
Foto © aus Osservatore Romano
Wennd ou kuon müodo Cent dromm gäbscht
as git etz immrhin zwoa Päpscht
der uo ischt ältr diosa alt
im Grund gno lond mih beyde kalt
Ih frog me was der Zirkus söll
weil ohne Kircho gäbs kuo Höll
zuwas bruucht dMenschheit harrgottsack
d Vizegott im Dopplpack
Der vorig also der a. D.
leabt zwor blöß no als Privatier
er ischt der erscht wo gseyt heat ach
ar sey im Sand und fühl se schwach
Bald wöar ar sechsodachzge voll
dromm dunk eahn sKrampfa numma toll
er zoag sich nomol am Balkon
und gang dänn flugs i dPension
Do händ dio Katholiko gschout
was sich der Heilig Vattr trout
so uona blibt jo sus im Amt
bis ar i dKischto juckt vrdammt
Sin Vorgängar d Paul der Pol
däs ischt an Hacklar gsii der wohl
der heat im Rollstuohl ganz am Schluss
no gmuoslat Sanctus Dominus
D Rücktrittspaparatzi wohn
im Kloschtr ohne Funktion
und schiob als graue Eminenz
dött dionn etz guot vrsorgt an Lenz
Ar hey dött endle siine Ruoh
und Zitt zum beata meh as gnuo
er meditier und schriib a Buoch
und krieg vo siinom Brüodr Bsuoch
Hüt waltat als di höchscht Instanz
d Kirchofürscht und Bischof Franz
us Südamerika kut der
ma säg eahm nid viel noch bisher
D Schörnborn heat vor kurzm gseyt
ma heats im Fernsehn übrtreyt
d Heilig Geischt nid dKardinäl
seys wo d Pontifex all wähl
SKonklav krieg ohne Bild und Ton
vo deam a Information
und müoss drnoch spirituell
an Art arspüro wean ar well
Däs händ di Herro also to
dänn ischt der Gwählt uf dLoggia ko
und bittot dass ma für eahn beat
dass er vom Chef d Seago heat
Und dChrischto as wio Schöf geeint
und brav am Petrsplatz vreint
händ blökat und halt beschtns glaunt
als Herde ihro Hirt bestaunt
Der heat salopp zum ganzo Clan
glei buona sera grüoft spontan
frei ussar ohne Manuskript
do heat natürle dMenge gflippt
Und alls heat gschwärmt scho rituell
dunk uom der Kerle an Rebell
däs sey an sealto coola Sock
i siinom lango wiißo Rock
Ar müg kuon Samt und kuon Rubin
und ou kuon Pelz vom Hermelin
sey Fuoßballfan und Gentlemen
wo voll d Maradonna kenn
Der Papscht ischt manchmol wirkle süoß
ar wäscht d Knaschtologo dFüoß
sKollegium sealb wüord numma nass
der Typ ischt irgondwio scho krass
Lot sin Mercedes uofach stoh
und macht sich in am Bus drvo
triofft schlichte Lüt und tuot an Schwätz
und git d klänna Gobo Schmätz
Ar setzt se für di Armo ii
d Vatikan hett gnuog Marie
doch der wür glei zur Furie
wenn Franz nid tät wio dKurie
Dromm heat ou er wenn Fäschtr siond
an hoho spitzo Huot am Griond
und anar Ketto rund ums Gnack
a Kruzifix nach siinom Gschmack
Dean gschiossno Ring no adr Hand
der scheints für Macht und Ehre stand
und wer privat eahn bsuocho komm
der küss däs Ding am Topo domm
Er treyt wio andre Päpscht bislang
a goldigs Krüz no uf ar Stang
ou agleyt ischt ar pflichtgemäß
mit bunta Stöff als Arbeitshäß
Ih wett nid wiossa was ma süg
wenn uos vo üs dio Sacha trüg
künnt sii dass uonom dSanität
mit Blauliocht i dValduna tät
Katholo muonond dass der Nöu
dean müodo Lado retta töu
und schneall arlös vo allor Schmach
doch langsam Lüt gemach gemach
Der mag sich a klä oago gio
Reformar wüord ar trotzdäm nio
zum Iorgr vom moderno Chrischt
as wüord alls bliibo wion as ischt
A Frou als Pfarrar hett kuon Sinn
as git ou kuo Aposchtelin
d Zölibat wüord nid vrbannt
wer Sex will niommt an Minischtrant
Und für Vrhüotung geabs kuon Grund
dött sey d Tüüfl mit im Bund
dromm muont no all d Katechet
ma bruuch meh Lüt uf deam Planet
Ou dHomos siond dm Papscht an Gruus
zmol hänkts dm liobo Gott dänn uus
weil der hey doch als Himmlsmacht
nach siinom Bild üs alle gmacht
Sprioch dLeschbo und di Schwuolo ou
as hoaßt jo er hey gär kuo Frou
egal wer nämle richtig gloubt
deam wär eh zwiifla nid arloubt
Und schlioßle dürft sich so alluo
d Schöpfar ou amol vrtuo
d Mensch als Paar macht Fehlar gnuo
und stoht oft nid amol drzuo
Wenn zwoa se kirchlich bundo händ
dänn söllonds büoßo bis zum End
sit ma sich trennt wägs jedom Furz
ischt dEhe vielmol bodo kurz
So endat früoh scho jede zweit
statt uom am Schluss d Tod befreit
dio Gloubossätz siond gwioss nid do
zum wios uom passat fallo lo
Dunkt öu der ganz Varein abschtrus
so siond so guot und treatond uus
klar usm Himml wüord dänn nünt
ou wenn ma was vrsummo künnt
Vom Rentnarpapscht wo jeda kennt
wett ih zum Abschied a Präsent
nid irgond eapas was woaß ih
ih möcht a ganz bestimmts für mih
Ih gear kuo Krüz und kuo Monschtranz
und kuon sakralo Firlefanz
ih wett vo eahm grad blöß des uo
dio megageilo roto Schuoh
Dio Treatar ganz in nuttorot
si wärond siochr sau komot
dio trüge ehrle huro gern
vo mir uus ou am Tag des Herrn
